#Мурожаат
Ҳурматли туманимиз аҳолиси!
Давлатимиз раҳбарининг жорий йил 1 апрель куни “Ёқилғи-энергия ресурсларидан ноқонуний фойдаланиш ва беҳуда сарфланишининг олдини олиш ҳамда энергия самарадорлигини ошириш бўйича чора-тадбирларни такомиллаштириш тўғрисида”ги 133-сонли қарори қабул қилинганидан яхши хабардорсиз.
Мазкур қарор билан аҳоли хонадонида ўрнатилган қуёш панеллари ёрдамида ишлаб чиқарилган электр энергиясини давлат томонидан сотиб олиш механизмлари белгилаб қўйилган.
Президентимиз томонидан ҳаётга татбиқ этилган ушбу ислоҳотни самарали кечишида Хива туманининг қуёшли ҳудуд эканлиги анчагина устунлик ва қулайлик беради.
Бироқ, таҳлилларга кўра, туманимизда бугунги кунга келиб ўз хонадонига қуёш панелларини ўрнатганлар сони 452 нафарга етди. Яна 114 нафар тадбиркор қуёш панелларини ўрнатган.
Бироқ, 34 та маҳалладаги 32 минг истеъмолчидан 11 348 нафари жорий йилнинг май ойининг ўзида 200 кВт.соатдан юқори миқдорда электр энергияси истеъмол қилишди.
Таҳлилларга кўра, жами аҳолидан 11 348 нафар истеъмолчи бир ойлик 200 кВт.соат, яъни истеъмоли базавий меъёр (лимит)дан ортиқ электр энергиясини ишлатган миқдори учун юқори нархларда пул тўлайди.
Масалан, “Шомохулум” маҳалласидаги биргина фуқаро Р.Рузметов хонадони жорий йилнинг май ойида 2 160 кВт. соат ёки 2 млн. 596 минг сўмлик, июнь ойида эса 1 678 кВт. соат ёки 1 млн. 877 минг сўмлик, 2 ойни ўзида 4 млн. 473 минг сўмлик энергияси истеъмол қилган.
Аксинча, “Шомохулум” маҳалласида фуқаро Д.Ваисов хонадонига 15 кВт.лик қуёш панелларини ўрнатиб жорий йил июнь ойида 3509 кВт. электр энергиясини ишлаб чиқариб, оиласига истеъмолидан ортган 3420 кВт. ёки 3 млн. 420 минг сўм даромад келтирди.
Бу каби қайта тикланувчи энергия манбаларидан самарали фойдаланишга ўтиб, даромадга кирган хонадонлар ортиб бормоқда.
Умуман олганда куёш неъматидан бемминат фойдаланаётган Д. Ваисов электр энергиясини давлатга сотиб даромад олаётганини яхшилаб мулоҳаза қилиб кўрсак, қуёш панелларидан фойдаланиш вақти аллақачон келганини тушуниш қийин эмас.
Ҳурматли фуқаролар!Агарда, Сиз қуёш панелларини ўрнатмасангиз, белгиланган таъриф бўйича тўлов амалга ошириб келасиз ва бу Сизнинг оилавий бюджетингиздан доимий харажат бўлади.
Агарда, қуёш панелларини ўрнатсангиз қуйидаги имтиёзларга эга бўласиз.
Қуёш панелларини ўрнатиб, ёруғлик ва қуёш орқали текинга энергия олиб, истеъмол қиласиз ва ортганини сотасиз.
Қуёш панелларини истеъмолингиздан юқори қувватда ўрнатиб, истеъмолдан ортиғини давлатга сотсангиз ҳар кВт. соат учун 1.000 сўмдан тўлаб берилади.
Қуёш панелларини имтиёз асосида харид қилиш имкониятлари бор.Солиқ кодексининг 428-моддасига кўра, 100 кВт.гача бўлган қайта тикланувчи энергия манбалари қурилмаларини ўрнатган тақдирингизда ушбу ускуна учун мол-мулк солиғидан, у эгаллаб турган участка учун ер солиғидан ҳамда ишлаб чиқарган энергияни сотишдан олинадиган фойда солиғидан 3 йил муддатга озод этиласиз.
Юқоридаги масалалар бўйича амалий ёки ҳуқуқий ёрдам керак бўлган тақдирда туман прокуратурасида мавжуд Штабнинг қуйидаги
+998623741007 рақамларига мурожаат этишингиз мумкин.
11.07.2025
26
Yangiliklar
